Assassin's Creed Origins

من الألعاب اللي تعلقت فيها في أيام الجيل السابق كانت Assassin's Creed، كل شيء عن السلسلة كان ملهم بالنسبة لي.. فكرة الحشاشين وقصتهم واللور العميق فيها كانت من الأشياء اللي خلتني فان مخلص طول هذيك السنين، لين صارت الإنتكاسة في الجودة وتساهل كبير مع أساسيات اللور العميق اللي تميزت فيه السلسلة مع إصدار الجزء الثالث للعبة، من هناك الوضع كان متدهور و الشخصيات الأيقونية مثل الطائر ابن لا أحد و Ezio Auditore استبدلت بشخصيات فارغة بلا هدف أو حتى اهتمام لعقيدة الحشاشين، مرت ACIII و Black Flag و Unity و Syndicate وأنا أفقد الأمل في السلسلة أكثر وأكثر .. إلى أن تم الإعلان عن جزء Origins واللي وعدنا برحلة في بداية مراحل تأسيس عقيدة الحشاشين وكيف تكونت، والآن مع اصدار اللعبة، هل رجعت ثقتي بالسلسلة من جديد؟ ولا كانت حلقة جديدة من مسلسل خيبات الأمل بالسلسلة كعادتي مع الألعاب الثانية؟

القصة تتمحور حول Bayek of Siwa آخر المدجاي (حماة الفراعنة ومصر) في رحلة انتقامه من اللي تسببوا في مقتل ابنه Khemu، تساعده في مهمة الانتقام زوجته Aya وترافقه في عدة مهمات، لكن يتضح الموضوع أنه أكبر من كذا وأن الناس اللي يطاردونهم جزء صغير من تنظيم كبير يهدد أمن مصر. القصة بدأت قوية وخفت بالأخير، للأسف حسيت فيه أشياء كثير استعجلوا فيها ومالقيت لها جواب مقنع مما خلاني احس ان القصة كانت محتاجة زيادة شرح وعمق يخليني راضية عن مجرى الأحداث اللي صارت، بصراحة تمنيت لو كان دافع Bayek غير عن الانتقام، لأننا شفنا هذا النوع من القصص في السلسلة نفسها واللي أفقدها عنصر الاهتمام وصار يغلبه عنصر التكرار، لكن للأمانة تجسيد مشاعر الخسارة والحزن العميق كان ممتاز ومؤثر، فعلاً حسيت بالأسى على شخصية Bayek ومحاولته في جبر جرح مستحيل ينجبر.

بعيداً عن القصة اللي تمنيت لو إنها أفضل، حبيت شخصية Bayek من الساعات الأولى في اللعبة، عجبني انه ما كان من الشخصيات النمطية اللي مرت علينا سابقاً، قدرته على التعاطف مع الناس اللي حوله وكيف تعامل مع مشاعره المتضاربة في اللعبة خلت منه شخصية محبوبة بالنسبة لي، زوجته Aya مع أن حضورها ما كان طاغي مثل زوجها، الا انها اثبتت نفسها كشخصية قوية ومستقلة، ومع إن دافعها مثل دافع Bayek إلا أن طريقتها في التعامل مع مشاعرها كانت مختلفة ومثيرة للاهتمام. الشخصيات الثانوية كانت من جيد الى جيدة جداً، شفنا شخصيات تاريخية أيقونية كعادة السلسلة مثل كليوبترا وقيصر ودخول قصصهم في اللعبة كانت من الأشياء المثيرة للاهتمام بالنسبة لي واستمتعت فيها.

والحين نجي للسؤال الأهم، كيف أضاف هالجزء لعقيدة الحشاشين واللور الخاص فيها؟ بصراحة مو كثير، القصة جاوبت على بعض الأسئلة مثل كيف تكونت العقيدة وليش بالضبط لكنها تركتني بأسئلة كثيرة واللي سببت لي احباط شوي، حسيت أن اللعبة كانت تهيئك لشيء قادم (يا توسعة أو إضافة) عشان كذا ما تم الإجابة على هذه الأسئلة.

القيم بلاي من الأشياء اللي شهدت تغيير كبير في أساسياتها عن الأجزاء اللي قبل، نظام القتال الحين تحسن بشكل كبير عن الأجزاء اللي قبل وصار يتماشى مع طبيعة اللعبة، يعني قبل كان بإمكانك تقاتل 10 جنود مع بعض وما تجيك أي ضربة لكن الحين صار النظام يعاقب الدرعمة ويرغم اللاعب أنه يحسب حساب لكل مواجهة لأنه بالتأكيد راح يموت إذا قرر يواجه أكثر من خمسة أشخاص، نظام القتال الحين يخلي اللاعب يتحرك حسب السلاح اللي معه (أول كان النظام يحرك اللاعب بشكل تلقائي للعدو). طبعاً، هذا النظام ما يخلوا من المشاكل والزين دايم ما يكمل، النظام مازال يحتاج للصقل والتضبيط خاصة نظام الدودج (التدحرج) اللي رفع ضغطي لمستويات جديدة، لكنه بشكل عام خطوة ممتازة للأمام واللي تدفع اللاعب للتخفي (مثل ما هو مفروض) بدال ما يدرعم داخل المعسكر ويقاتل فوق الـ 10 جنود بدون مشاكل باستخدام حيل رخيصة تخليه يقتل العدو بون شوت، لكن … للأسف اللعبة تدفعك لاستخدام عناصر التخفي اللي حسيتها ناقصة وتحتاج زيادة عمق بنظري، يعني استراتيجيتك الوحيدة لما تقرر تتخفى هي قتل كل رماة السهام + تعطيل جرس الإنذار، تقدر تستخدم أشياء ثانية مثل سهام التنويم أو السموم لكن اللعبة ما تدفعك بشكل فعلي أنك تغير من استراتيجيتك، عندك الخيارات مفتوحة لكن الدافع لاستخدامهم معدوم تماماً، تمنيت لو كان فيه عمق أكثر في التخفي أو على الأقل تتغير حركات الحراس بناء على استراتيجياتك السابقة عشان تدفعني أنوع شوي.

يقدر Bayek يستخدم مجموعة لا بأس بها من الأسلحة (القوس والسهام والسيوف والرماح والأسلحة الثقيلة وغيرها)، تقدر تختار اثنين من هالأسلحة وتبدل بينها بسلاسة وسط القتال، وتتميز كل فئة من فئات هالأسلحة بحركة قاضية مميزة لما يكتمل عداد الأدرينالين واللي تسمح لـ Bayek أنه يضرب ضربة قوية جداً، طبعاً كأي WRPG فيه نظام تطوير للمستوى وشجرة مهارات (Ability Tree)، في Origins يتطور Bayek من خلال شجرة مهارات تتكون من ثلاث فئات كل فئة لها خاصيات مميزة:

• الصياد (Hunter): واللي تركز بشكل كبير على مهارات الصقر Senu ومهارات القوس والسهام.

• المقاتل (Warrior): واللي تركز على مهارات القتال المباشر بالسيوف.

• العراف (Seer): واللي تركز على استخدام الأدوات والخدع ضد العدو مثل سهام التنويم والصرع والتسميم وغيره.

يقدر اللاعب أنه يستثمر فيهم كلهم حسب طريقة لعبه باستخدام نقاط القدرة (ability points) اللي تمنحك إياها اللعبة لما توصل مستوى جديد أو تسوي بعض المهام في العالم. الشيء اللي أعجبني بالتطوير أنه ما يقتصر بس على هذه الشجرة، تقدر من خلال الحرفة (Crafting) أنك تطور أشياء أساسية ومهمة جداً مثل حياة Bayek وقوة ضرباته وقوة الـ Hidden Blade وغيرها من الأشياء اللي بتلاقي نفسك في موقف ضعيف اذا ما طورتها مما يعطي دافع اني اجمع المعدات من خلال صيد الحيوانات أو الاستكشاف. وأخيراً من التغييرات الجديرة بالذكر في السلسلة هي خاصية رؤية الصقر (Eagle Vision) واستبدالها بـ Senu الوفية (يا جماعة تجنن والله) واللي تساعدك في كثير من جوانب اللعبة، تقدر تستخدم Senu عشان تشوف لك وضع المعسكرات وتعلمك وين المداخل السرية ووين الكنوز والأشياء الثمينة.

العالم في Origins شهد نقلة نوعية من جميع النواحي، أخيراً ابتعدنا عن المناطق والأماكن النمطية (والهياط الإلكتروني) ودخلنا في عالم واسع يتميز بحضارة الفراعنة القديمة اللي ابهرتني بصراحة، العالم كان مفعم بالحياة بتنوع البيئات والسكان والحيوانات، والمبهر بالموضوع أن اللعبة كانت تصور ذيك الحقبة بأدق تفاصيلها حتى الازدهار العمراني (خاصة في مدينة الإسكندرية) كان من أفضل ما رأيت في الألعاب الى يومك هذا، تعلمت الكثير عن هذه الحضارات من خلال استكشافي للقبور والمعابد والأهرامات واللي تم تصميمها بشكل جميل جداً لدرجة أني حرفياً دخلت كل قبر ومعبد باللعبه (لا يفوتكم الـ Sphinx).

بالنسبة للمهمات والمحتوى الجانبي، بعضها كان نمطي وعادي (مثل اقتحام المعسكرات وتجميع الكنوز والصعود لأعلى القمم..الخ) لكن بنفس الوقت تم اضافة مهام جانبية رهيبة، بعضها قصصها كانت عميقة ومؤثرة وارتبطت ارتباط كبير بالحضارة الفرعونية واليونانية وآلهتهم واعتقاداتهم القديمة واللي أثارت اهتمامي كشخص مهتم بالحضارات الثانية والميثيولوجية تبعهم، من المهمات الجانبية اللي أثارت اهتمامي هي المخطوطات اللي تلقاها في العالم واللي هي عبارة عن لغز تحله وتكتشف شي حلو (يا كنز مدفون أو قصة). وكمان فيه مهمات يومية يقدم لك اياها NPC خاص، طبعاً مستوى هذه المهمات اليومية عالية جداً وبعضها تقاتل زعماء جداً أقوياء، أنصح في هالمهمات لأنها تعطي أشياء ثمينة مرة والقتال نفسه مثير للاهتمام. الموسيقى كانت جيدة جداً لكن تمنيت أن لها حضور أكثر وقت الاستكشاف، فيه مرات كثير تمنيت وجود موسيقى وقت استكشافي للصحراء أو الغابات عشان تدخلني جو أكثر.

وأخيراً، بغض النظر عن العيوب اللي ذكرتها، اللعبة قدمت لي تجربة جميلة رجعتني لعالم الحشاشين من جديد، حبيت كيف أخذوا الأشياء اللي ميزت ألعاب تقمص الأدوار الغربية وطبقوها بطريقتهم الخاصة، هاللعبة عطتني إحساس Assassin's Creed Brotherhood لما لعبتها أول مرة كيف كنت مستمتعة مرة باللعبة واستكشف كل جانب منها، قضيت مع اللعبة حوالي 32 ساعة (سويت أغلب المهمات وجمعت تقريباً كل شي)، بصراحة هذه اللعبة عطتني أمل لمستقبل السلسلة وأقدر اعتبرها خطوة للأمام، لكن اتمنى من كل قلبي أنه يتم تسليط الضوء على العصر الحالي من الحشاشين في الاضافات الجاية، لأنهم هم الأساس بالأخير.