Middle Earth: Shadow of War

​لعبة Shadow of War من الألعاب اللي كنت مرة متحمسة لها بعد الإعلان عنها خاصة إني حبيت الجزء الأول Shadow of Mordor، مع أن القصة كانت لك عليها إلا إنها قدمت محتوى رهيب وممتع أخذ مني ساعات طويلة من اللعب والاستكشاف، الخبر الحلو أن لعبة Shadow of War لعبة رهيبة وممتعة وأفضل من اللعبة السابقة (اذا تغاضينا عن القصة الكارثية)، الخبر السيئ أن الناشر هو Warner Bros.

قصة اللعبة تتمحور عن ... مدري؟ القصة كانت من الأشياء اللي فعلا ما فهمتها ولا ترتيبها ولا شي، فيه شخصيات كثيرة لها مهمات أساسية لكن ترتيبها وحتى أحداثها كانت غير متناسقة فكان فيه خط غير واضح بين المهمات الأساسية للقصة والمهمات الجانبية، اللور كان مضروب والتجميعات (collectables) ما ساعدتني كثير أني أفهم وش صاير بالعالم. بدون حرق، فيه فكرة معينة تتمحور حولها اللعبة لكن ما حسيت أن تم توصيلها بشكل مرتب أو مفهوم للاعب غير إنها مملة أصلاً والشخصيات ما ساعدتني أتحمل القصة نهائي، وكان فيه لحظات كثيرة تمنيت أني أقدر أتعدى المشهد وأرجع لرتم اللعب الحماسي.

العالم عادي جداً وقريب جداً من الجزء الأول مع بعض التغييرات البسيطة، العالم مو عالم واحد كبير بل تم تقسيمه لحوالي 4-5 مناطق كل وحدة فيهم مختلفة اختلاف بسيط عن الثاني، بصراحة ما توقعت تغير كبير بالعالم لأن عالم Mordor له أساسيات معينة صعب تتغير تغير جذري عن الجزء اللي قبل.

بالنسبة للقيم بلاي وطريقة اللعب، من أفضل الأشياء اللي قدمتها اللعبة هو التنقل في عالم Mordor وبين المباني، تم تسهيله بحيث تاليون تنفتح له خاصية من بداية اللعبة بإمكانه من خلالها أنه يركض ويتسلق المباني بسرعة هائلة مما سهل علي كثير مهمة الاستكشاف والتنقل لدرجة نادراً ما استخدمت خاصية التنقل السريع (fast travel).

القتال كان رائع بما تعنيه الكلمة من معنى، شجرة المهارات كانت متنوعة وعميقة بشروط معينة تمنع اللاعب من أنه يصير OP بسرعة وحافظت على عنصر التحدي في اللعبة، مثلا كل مهارة لها فروع، يحق لك فقط تختار فرع واحد (تقدر تغيره بأي وقت) بحيث يحس اللاعب أنه تطور بدون ما يصير OP ويكسر اللعبة.

طبعا كل زعيم له نقاط قوة ونقاط ضعف تخلي اللاعب يغير من طريقة مواجهته للأعداء فمثلا فيه أعداء ما يتأثرون بالنار أو بالهجمات الخفية (stealth attacks) مما ينبغي من اللاعب أنه يغير طريقة مواجهته، بعض الأعداء ممكن بعد يتكيفون مع طريقة قتالك فمثلا اذا كنت بس تنطط فوقهم وتضربهم من الخلف راح تكيفون مع استراتيجتك ويمنعونك من أنك تنط فوقهم مما يرغمك تلقى طريقة ثانية تهزم فيها العدو.

تتوفر لتاليون مجموعة من المعدات اللي تتفاوت قوتها وتقدر تطورها، اللي لونها بنفسجي هي المعدات الأسطورية والأقوى بينهم كلهم وعشان تطورها لازم تسوي تحديات معينة تمكنك من تطويرها وتخليها تستمر معاك لفترة أطول، طريقة الحصول عليها سهلة نسبياً، تكمل مهمات معينة أو تقاتل زعماء أسطوريين عشان تطيح لك المعدات. بالإضافة الى وجود Runes من خلالها تقدر تزيد قدرات المعدات اللي عندك مثلاً تزيد نسبة الحظ أو حياة تاليون أو قوة الضربة، الـ runes لها 4 مستويات تزيد من نسبة تأثيرها على المعدات.

من الأشياء الجديدة في اللعبة هي حرب الحصن (siege war)، الفكرة هنا أنك تجمع جيش من ال orcs من خلال استخدام قوة الخاتم لإخضاعهم وترغمهم يحاربون بصفك، بعد ما تجمع الجيش تبدأ بالهجوم على حصن العدو (في كل منطقة فيه حصن كبير) تقدر من خلال هذا النظام تختار مين بيحارب معك وايش الخواص اللي راح يقدمونها في المعركة (بعضهم مثلا عنده مدافع نارية والثاني عنده تنانين تقاتل العدو من فوق ..الخ) فيه خيارات كثيرة للاعب والمطلوب من اللاعب أنه يعرف مين يأخذ وايش الخاصية اللي عند العدو عشان تقدر تصدها مثلا اذا العدو عند تنين هنا الأفضل أنك تجيب واحد معاه رماة السهام (archers) عشان يتصدون للتنين ويطيح بسرعة. حروب الحصن جدا جدا ممتعة .. ببداية اللعبة، ومن هنا بدت الأمور تخرب.

بعد ما خلص الفصل الثالث من اللعبة، واللي ظهرت فيه "وحدة" من نهايات القصة، دخلت مباشرة للفصل الرابع واللي كان عبارة عن حلب حروب الحصن لين تطلع حرفياً من خشمك، الحروب صارت من ممتعة ورهيبة الى واجب غثيث لازم تسويه عشان تطلع النهاية "الحقيقية" للعبة، وما أتكلم أنا عن مرتين ثلاث .. عادي جداً توصل لعشر مهمات تسوي نفس الشيء .. كل هذا عشان يرغم اللاعب بكل بجاحة أنه يشتري لوت بوكس ويطلع الزعماء الأسطوريين (legendary) عشان تسهل عليك عملية الدفاع عن الحصن، بإمكانك أنك تحصل عليهم باللعبة بدون ما تشتري اللوت بوكس لكن فرصة لقائهم باللعبة تعتمد عليك أنت وحظك، مافيه طريقة مضمونة فيها تلقى الزعيم الأسطوري إلا باستثمار ساعات طويلة من وقتك تسوي مهمات مكررة وأنت تدعي عشان يطلع لك الزعيم الأسطوري، وعلى فكرة .. لازم يصيرون نفس مستواك ولا ما تقدر تخضعهم وتحصل عليهم، هذا غير فلوسك باللعبة اللي ممكن تخلص عليك بنص مهمات الدفاع عن حصنك (واللي راح تدفعك تسوي قرايند زيادة على اللي أنت المفروض تسويه ... أو تشتري لوت بوكس) ..

بالنهاية لعبة شادو أوف وار ممتعة وتقدر تلتمس الاهتمام بالقيم بلاي والمهمات (مع أن قصتها خايسة وغير مرتبة) إلا إنها ممتعة ومتنوعة وفيها قدر كبير من التحدي، قتال زعماء الـ orcs جداً ممتع والأفضل من ذلك أن ال orcs نفسهم لهم شخصيات متنوعة وحلوة خاصة لما يصيرون بصفك. هل أنصح باللعبة؟ اذا أنت من الناس اللي تهتم بالقيم بلاي أكثر من القصة؟ خذها بعد التخفيض، لأني ما أقدر أقول لأحد وضميري مرتاح أنه يشتري اللعبة بسعرها الحالي والفصل الرابع من اللعبة بهذا الشكل ، بكل صراحة اعتبر الفصل الرابع عار، مو منطقي تخليني أسوي قرايند كأني بلعبة MMORPG كورية مجانية عشان أطلع النهاية الحقيقية، جداً مستاءة من Warner Bros وطريقة تعاملهم مع اللعبة بهذا الشكل الرخيص، واضح أن توجههم صاير مثل EA واللي يخليني أخاف على الأجزاء القادمة من اللعبة. وإذا كنت من الناس اللي ما تلعب الألعاب إلا عشان القصة، لا تشتري اللعبة خير شر.​